[食評]炸雞出名、但蛋卷最正

井之翹 四郎 食評 Leave a Comment

餐廳資料:Red Chicken

今日收工、有位同事睇完我之前所寫的韓式炸雞文、勾起佢條癮又想食雞😂 但又因為唔想為左食炸雞就走去新浦崗、我地三個麻甩佬就系尖沙咀尋雞…(大誤、並非夜浦文)

睇抄牌既位置只有兩枱…

三個男人,為雞以來,一坐低就嗌左個一雞兩味(半半炸雞:香辣汁&蒜香汁)

半半炸雞:香辣汁&蒜香汁($158

香辣汁屬十小辣程度,但帶有微甜,蒜香汁唔辣,個汁好rich又夠咸口,拎中沾到大pet汁既會好似食緊蒜頭咁。(個人喜好:甜口)

可能因為個香辣汁對我黎講始終都係太辣,而且雞肉大多係雞胸肉,食得出無乜點醃過,肉質雖軟,但同食某家鄉既炸雞分別不大。

可能今晚我地來得略晏,店內就只有兩枱人,睇得出枱櫈擺位同上次果間Korean Canteen 完全相反,整間餐廳都相當闊落。

韓式芝士蛋卷

一個亳不起眼既菜式,如果唔係其他人叫的,我一定會錯過這個今晚的主角 – 韓式芝士蛋卷。

蛋卷軟熟,似日式煎蛋般帶微甜,鐵板上的芝士被烤至半乾身時就係食佢既最好時機。用匙將芝士焦都刮起來,包住個蛋卷黎食就係最好食。但最好同人share,多食會膩。

部隊鍋

鍋底放了泡菜的部隊鍋,鍋料頗位不足,三個麻甩佬食,我只食到一點午餐肉碎及幾條粉絲… ,所以不多以評價,但湯底唔算辣,都係屬於辣唔起既人可以享受既菜式。

總結

今次係一次唔完整既食評,因為個部隊鍋真係掂唔到咁滯,所以只可以話我欣賞個蛋卷多過炸雞。上次Korean Canteen 既一口一炸雞反而更得我心。今次三個人食三個菜+三杯飲料大概每人$230左右。考慮到每碟餸既份量都差不多二人份,單獨來的人要留意下了。

發表回覆

你的電郵地址並不會被公開。 必要欄位標記為 *